Ni kun granda ĝojo informas vin pri tio ke dum la ĵus finiĝinta Universala Kongreso de Esperanto, edukado.net prezentis sin dum la Movada Foiro kaj gvidis 16 paroligajn lecionojn je du niveloj, kiujn partoprenis plurcent kongresanoj. La 90-minuta aranĝo METIEJO allogis centon da homoj, kiuj kun intereso rigardis niajn instruilojn, dancis korelative, foliumis la elprintitajn materialojn de la Lerniloteko kaj Metiejo, renkontis niajn kunlaborantojn kaj la verkistojn Stano Marček, Dennis Keefe kaj Paul Gubbins, parolis kun gvidantoj de diversaj projektoj kaj partneraj organizaĵoj. Multaj vizitantoj kunprenis kelkajn el la ĉ. ducent senpagaj brokantaĵoj kaj aĉetis tombolon, dum kiu estis lotumitaj 25 libropremioj.

Dum la semajno estis disdonitaj 1000 pinĉiloj, kiujn multaj el la kongresanoj surhavis kaj espereble laŭcele uzis.

Nia retejo estis  rimarkeble ĉeesta dum la kongreso, kies ferma ceremonio portis al ni grandan surprizon.

Edukado.net ricevis premion de UEA pro ĝia elstara agado por la Internacia Lingvo Esperanto.

La diplomo estis transdonita al Katalin Kováts, redaktoro de la retejo, antaŭ milo da esperantistoj. La prestiĝa rekono de la plurjara agado espereble gvidos al fruktodona partneriĝo de la retejo kaj UEA.  

Feliĉe pro la rekono kaj gratule al nia „frata” retejo lernu! (kiu ricevis la saman diplomon pro sia agado) ni  deziras al vi ĉiuj bonajn somerajn feriojn.

Katalin Kováts, redaktoro

Retejo kaj kuriero de la UK videblas ĉi tie.

Viajn pensojn kaj gratulojn ni volonte legos en la Gastlibro.

Ps. Ni atendas kaj publikigos fotojn, senditajn de la ĉeestintoj, ja dumlabore ni mem ne povis foti.

          Fotoj de Slezákné Tar Edit (Hungario)

        La kerno de la teamo:Sylvain, Bea kaj Katalin             -     Angulo de la METIEJO dum UK.

Fotokolekton vi povas vidi malferminte tiun ĉi PDF-dokumenton.

...

 Vizitu la METIEJOn de edukado.net dum UK 

Estimataj membroj,  

Jam de pluraj jaroj www.edukado.net aktive partoprenas la universalan kongreson, gvidas tie ĉiutage lingvokursojn en du niveloj. La intereso estis granda, la sukceso neforestanta.

Tiajn kursojn ni denove okazigos en Roterdamo. Vidu la anoncon pri ili.

Ni reludas ankaŭ la PINĈILUMADON, pri kio vidu la koncernan paĝon.  

Krom la lecionoj kadre de la programo METIEJO ni kutime dufoje semajne havis renkontiĝeblon kun niaj membroj kaj novaj interesuloj.

Dum tiu aranĝo ĝis nun okazis nur prelego pri la paĝaro.

Ĉi-jare ni planas ŝanĝi tiun tradicion kaj provas novstile organizi la disponeblajn 90 minutojn.

Post 15-minuta enkonduko la vizitantoj havos eblon ĉirkaŭiri dekon da stacioj, kie ili, laŭ siaj interesoj, povas orientiĝi pri la paĝaro mem, pri ties laboro, materialoj kaj teĥnikaj flankoj.

Estos eblo renkontiĝi kun multaj el niaj kontribuintoj, aŭtoroj de ekzercoj kaj materialoj; renkontiĝi kun la  reprezentantoj de pluraj partneraj organizoj (ekzemple Brazilei)  kaj projektoj, kiel Lingvolanĉilo, Springboard, AKEL ktp.  

Ĉeestos ankaŭ Humphrey Tonkin, prezidanto de nia subtenanta fonduso ESF kaj deĵoros akademiano Marc Bavant por respondi al viaj tiklaj gramatikaj problemoj.

Ilona Koutny,  gvidantino de la interlingvistika fako en la universitato en Poznan informos pri la en septembro startontaj novaj interlingvistika semestro kaj trejnado de Esperanto-instruistoj. Ne mankos budo pri la Komuna Eŭropa Referenckadro kaj nova ekzamensistemo.  Oni povos eĉ forlasi la realan mondon kaj pere de la reto viziti kursejon en la DUA VIVO kaj esti gvidataj de Anna Löwenstein, la tiea instruisto.

Ni invitis ankaŭ kelkajn sukcesajn verkistojn de lerniloj, kiel Stano Marček, Paul Gubbins kaj Dennis Keefe pri kies verkoj vi povas ricevi rektajn informojn de la aŭtoroj mem.  

Niaj plej proksimaj kunlaborantoj, inter ili Beatrice Allée, Sylvain Lelarge, Mónika Molnár, Arlette Plutniak kaj ankaŭ aliaj atendas vin por interŝanĝi spertojn kaj konatiĝi.

Inter la partoprenantoj ni lotumos valorajn instruhelpilojn kaj eldonaĵojn.       

Ni ŝatus tiel okazigi tiujn 90 minutojn, ke la vizitantoj trovu al ĉiuj siaj problemoj kaj demandoj solvojn kaj respondojn, kaj samtempe spertu la multflankan laboron kaj agadon de nia paĝaro. Estu ne nur teorio, sed multaj praktikaj aferoj, tuŝeblaj, videblaj instruhelpiloj, neforgeseblaj renkontiĝoj.

Notu jam nun en vian agendon la nemistrafendan dumkongresan programon METIEJO:

kiu okazos ĵaŭdon - inter  la 11.00 kaj 12.30.

Atendas vin la organizanto: Katalin Kováts, redaktoro de la paĝaro

Dum UK en Roterdamo

Paroligaj kursoj je du niveloj

Ĉiutage la blua kaj verda lecionoj estas la samaj

je ambaŭ niveloj. Sufiĉas viziti nur unu el ili.

Metiejo – ĵaŭdon 11:00-12:30

Dum la programo funkcios la subaj standoj

·         Kio estas edukado.net?

·         Nia teamo -  Niaj kontribuantoj 

·         Ekspozicio de ekzercoj kaj materialoj

·         Instruiloj, helpiloj, trukoj, ideoj

·         Teknikaj demandoj

·         ESF – nia sponsoro

·         Referenckadro, lingvoniveloj, ekzamenoj

·         Katedro – filmprojekto

·         Niaj gastoj: verkistoj de lerniloj  

·         DUA VIVO – vizito de virtuala kursejo

·         UAM – informoj pri la nova studsesio

·         Lingvolernigaj projektoj  

·         Lingva konsultejo de la Akademio

Okazos tombolo kun premioj de novaj instruiloj  kaj eblos kunpreni senpagajn brokantaĵojn.

Venu ankaŭ vi!

Mi informas vin, ke ĵus finpretiĝis ekzercaro, kiu paŝon post paŝo helpas kompreni kaj prilabori la legolibron Krimo de Katrina, verkita de Sten Johansson. Ĝi estas la unua libro de la Katrina-serio. Pri ĝi vi povas legi detale en nia KATALOGO.
La nun pretigita kajero enhavas po 4-5 variajn ekzercojn por ĉiu ĉapitro. Prilaborante la ekzercojn la legantoj povas spertiĝi pri la uzo de pluraj gravaj elementoj de baza gramatiko, kiel ekzemple akuzativo, pronomoj, prepozicioj, korelativa tabelo ks, kaj samtempe ekhavi geografiajn kaj historiajn konojn. Ne lastokaze ankaŭ tio gravas ke post legado kaj profunda kompreno de (eble la unua) legolibro en Esperanto oni pli multe kaj pli volonte legos aliajn librojn en la lernata lingvo.

La ekzercaro (pretigita baze de la dua eldono de la libro) uzeblas dumkurse kaj por individua lernado. Eblas peti ankaŭ la solvojn, kiuj helpas en la kontrolo de la taskoj.
La materialon mi multobligas nur je individua mendo.
Se iu volas havi ĝin dum UK, bv skribe mendi ĝin plej malfrue ĝis la 12a de julio.
En la libroservo de UEA aĉeteblos /mendeblos la libro mem.
Nigra-blanka versio de la ekzercaro kostos ĉ. 5 eŭrojn, kolora versio ĉ. 10 eŭrojn. Ambaŭ kun diketa titolpaĝo, ringe kunigitaj.
Jen eblo por vidi la unuan ĉapitron en PDF-formato.
                                                                                           Bonan legadon, Katalin Kováts

EsperantoDVD.net

La temo de la ĉi-monata artikolo de Monda Mozaiko estas la Panoramo de Mesdag, unu el la plej grandaj kaj plej belaj panorama-pentraĵoj de la mondo.

Ĝi estis pentrita ene de 4 monatoj en la jaro 1881 kaj estas eĉ nun videbla en sia originala loko, en Hago (Nederlando).

La muzeo disponigas sondiskan ĉiĉeronadon tiel, ke oni ludigas diversalingvajn prezentotekstojn, depende de tio, kion oni petas je la aĉeto de la enirbileto.

Tiel dum la admirado de la pentraĵo la tuta vizitantaro povas 4-5-foje aŭdi diversajn nacilingvajn tekstojn pri la Panomaro kaj ties historio.

Ekde la 10a de julio tia sonmaterialo disponeblas en la muzeo ankaŭ en Esperanto.

Nia redakcio tiel volis kontribui al la ekskurso-programoj de la kongresanoj, kaj ankaŭ trovi manieron por la disvastigo de Esperanto.

Vizitantoj de Hago, ne mistrafu iri al la muzeo kaj peti tie la esperantlingvan prezentotekston.

Por tiuj, kiuj ne povas veni al nia urbo, ni indikas la hejmpaĝon de la Panoramo de Mesdag, kaj se iu volas havi la pentraĵon kiel ekranprotektilon, ghi elŝuteblas ĉi tie.

Por facililigi la uzon de la materialoj ni kreis printeblan PDF-dosieron kun foto, kiun vi trovas fine de la reta artikolo.

La alŝutita sondosiero identas kun tiu, kiu aŭdeblas en la muzeo mem.

-------------------------------

Ni atentigas vin, ke la materialoj en la Monda Mozaiko elŝuteblas sen ensaluto, sed aldono de rimarkoj kaj alŝutaĵoj eblas nur se vi ensalutas la paĝaron kiel membro.

Bonvolu sciigi al ni vian opinion pri la sekcio kaj ties materialoj, pri ilia utileco en via instrulaboro aŭ lernado.

Serĉu en la Monda Mozaiko la artikolon de julio 2008.

La fama videokurso MAZI EN GONDOLANDO (taŭga ne nur infanoj) nun elŝuteblas en la reto.

Legu pli en la FILMEJO.

  Mejzi -filmoj

Muso Mejzi kaj liaj amikoj - la sciuro Cirilo, la elefanto Eduardo, la krokodilo Karlo kaj la birdo Talula - ŝatas ludi per akvo kaj aliaj aferoj.

La filmo MEJZI-Ŝpruc estas dividita je 10 epizodoj de 5-minutoj:

Pingveno, Akvotubo, Ĉokolada kuko, Bobeloj, Singulto, naĝado, Fiŝo, Glacio, Remado kaj Delfeno.

La esperantigo de "Maisy Splash" estas laboro de

Jacob Nordfalk, Narendra Bhattaral kaj Navaraj Budha en Nepalo.

Voĉlegas: Jacob Nordfalk, kiu volonte akceptos viajn reagojn kaj helpon.  

La filmoj ludiĝas en la porgramo VLC.

La filmo MEJZI-ŝpruc elŝuteblas en AVI-formato ĉi tie.

Dokumentoj, aliaj informoj pri ĝi legeblas ĉi tie.

La alia filmo (ludtempo) kvankam jam spekteblas, ne estas ankoraŭ finmiksita.  

La filmo MEJZI-ludtempo elŝuteblas en AVI-formato ĉi tie.

Dokumentoj, aliaj informoj pri ĝi legeblas ĉi tie. 

Vidu pliajn filmojn en la FILMEJO!

Temas pri konferenco de Asocio de Lingvo-Testistoj en Eŭropo (ALTE), sed inter ĝiaj partoprenantoj estas ekzamenfakuloj el la tuta mondo. La konferenco daŭras de la 10-a ĝis la 12-a de aprilo. Krom fakprelegoj, grupkunsidoj, pritraktado de diversaj aspektoj kaj socia rolo de la testado de fremdlingva kono, prezentiĝas ankaŭ la ebleco konatiĝi kun gekolegoj el prestiĝaj edukinstitucioj kaj internaciaj fakorganizaĵoj. La novaj ekzamenoj de UEA kaj ILEI laŭ la Komuna Eŭropa Referenckadro (KER) estas ellaborataj en niveloj B1, B2 kaj C1 kunlabore kun la Ŝtata Lingvoekzamencentro (ITK) en Budapeŝto, kie Esperanto troviĝas inter la ŝtate rekonataj fremdaj lingvoj kaj kadre de ties ekzamensistemo havas la samajn rajtojn kiel la aliaj fremdaj lingvoj. Plurmil kandidatoj estas testataj ĉiujare en la menciitaj niveloj en la t.n. dulingva (hungara-Esperanta) versio de la lingvaj ekzamenoj.   En la konferenco de ALTE partoprenas Zsofia Korody, la vicprezidanto de ILEI. Ŝia partopreno provizas al UEA kaj ILEI bonan okazon por spertiĝi en ne-esperantista faka medio, ekhavi informojn pri novaj esploroj kaj lerni pri la daŭra evoluo de internacia lingvotestado.

Komence de la pasinta jaro aperis ĉe UEA la broŝuro "La Komuna Eŭropa Referenckadro" (3,00 EUR), kiu enkondukas al la bazaj nocioj de la nova unueca lingvotestado. Intertempe aperis ankaŭ la ampleksa, 262-paĝa verko "Komuna Eŭropa Referenckadro por lingvoj: lernado, instruado, pritaksado". Krom aĉetebla libroforme (27,00 EUR), ĝi estas elŝutebla ĉe la TTT-ejo www.edukado.net.
 

La Esperanto-versio de Komuna Eŭropa Referenckadro, ekspoziciita dum la ALTE- konferenco en Kembiĝo.

(Meza breto, unua libro) 

        PARTNERIĜO    

Ni informas vin, ke nia paĝaro kreis partneran laborrilaton kun la Brazila Sekcio de ILEI.
La ambaŭflanka rekono de aktiva kaj valora laboro de la partnero por la celo helpi Esperanto-instruantojn decidigis kunigi la fortojn kaj subteni unu la alian.

Brazilo estas dekomence tiu lando, el kiu ni havas (post Francio) la plej multe da membroj (aktuale 197 el 1959). Por pliprofundigi kaj fari la rilaton inter nia paĝaro kaj membroj de BRAZILEI Katalin Kováts kun Jose Roberto Tenorio sekciestro ekagis por krei plurajn kunlaborajn projektojn kadre de kiuj

BRAZILEI

Ø  informas pri siaj agadoj kaj aranĝoj, rilataj al la instruado de E-o kaj trejnado de E-instruistoj;

Ø  ekde nun vendas edukado.net-eldonaĵojn, inter ili la libreton Poŝamiko;

Ø  sendas lernilojn por ties prezento en la KATALOGO;

Ø  instigas siajn membrojn je uzo de la servoj kaj kontribuoj al la materialoj de edukado.net,

Øpublikigas sur sia retejo la logotipon kaj ligojn al la porinstruista retejo;

Ø  alvokas siajn instruisto-membrojn registri siajn lernejajn kursojn en la sekcio E-lernejoj ;

Ø  helpas en la testado de novtipaj ekzamenoj laŭ la Referenckadro ;

Ø  disponigas al edukado.net siajn metodikajn artikolojn.

edukado.net

Ø  prezentas la lernilojn, produktitajn en Brazilo,

Ø  republikigas en la LEGEJO en aparta sekcio artikolojn de BRAZILEI;

Ø  informas la tutmondan legantaron pri la poresperantaj laboro kaj aranĝoj en Brazilo

Ø  helpas en metodikaj demandoj, ellaborado de programoj kaj per konsiloj al unuopaj membroj, kursgvidantoj kaj kursorganizantoj;

Ø  aktive agas por ke la Komuna Eŭropa Referenckadro kaj la novtipa ekzamensistemo estu konata kaj aplikata ankaŭ en Brazilio.

La supra listo prezentas nur kelkajn nunajn ideojn, kiuj certe multobliĝos kun la paso de la tempo.

Vidu jen kelkajn jamajn rezultojn de nia kunlaboro:

Legu la lastan revuon de BRAZILEI, en kiu vi trovas intervjuon kun Katalin Kováts, redaktoro de edukado.net.

Serĉu en la LEGEJO la sekcion BRAZILEI, kie ni regule aperigos novajn artikolojn de nia partnero.

BRAZILEI- transprenitaj artikoloj  Kadre de kunlaboro kun BRAZILEI nia redakcio transprenas valorajn kaj utilajn metodikajn artikolojn el la fakrevuo de la Brazila sekcio de ILEI. Dankon por la permeso publikigi ilin en nia retejo. La artikolojn vi povas retrovi ankaŭ en aliaj rubrkoj de la LEGEJO, depende de ilia konkreta temo. artikoloj (5) ARTIFIKOJ POR EVITI KONSULTON AL VORTARO verkis: TENORJO, Joseo /BRAZILEI, n-ro 4/2007   PRI LA VALORO RAKONTI KAJ AŬSKULTI RAKONTOJN verkis: VIANA, Paulo Sergio /BRAZILEI, n-ro 4/2007   Paroligante la lernantaron verkis: NASCENTES, Paulo / BRAZILEI, n-ro 5/2007